🟥 शहीद नायक प्रदीप साहेबराव मांदळे स्मृतिदिनी भव्य श्रद्धांजली सोहळा — रक्तदान करून वीराला सलाम 🟥

             पत्रकार महिंद्र इंगळे पिंपळगाव लेंडी

मातृतीर्थ सिंदखेड राजा तालुक्यातील पळसखेड चक्का गावचे सुपुत्र, देशासाठी सर्वोच्च बलिदान देणारे वीर जवान शहीद नायक प्रदीप साहेबराव मांदळे यांच्या पाचव्या शहीदस्मृती दिनानिमित्त शहीद स्मारक ठिकाणी भावपूर्ण श्रद्धांजली सोहळा पार पडला.

भंते यशोदीप थेरो व भंते रेवत यांच्या मार्गदर्शनाखाली पाच भंते यांच्याकडून परित्राणपाठ करण्यात आला. यश सिद्धी सैनिक संघ बुलढाणा, महाराष्ट्रचे अध्यक्ष श्री. अनिल डोंगरदिवे व त्यांच्या टीमने शूर वीराला सलामी देत अभिवादन केले. त्याचप्रमाणे समता सैनिक दल सिंदखेड राजा यांनी देखील शूरवीराला श्रद्धांजली अर्पण करत सलामी दिली.

शहीद जवानाच्या स्मृतिदिनानिमित्त एकूण १८ जणांनी रक्तदान करून देशासाठी प्राणार्पण करणाऱ्या वीराला मानाचा मुजरा अर्पण केला. कार्यक्रमात सामाजिक बांधिलकी जपत विविध मान्यवर व माजी सैनिकांना संविधानाच्या प्रती शहीद नायक प्रदीप साहेबराव मांदळे फाउंडेशनतर्फे भेट देण्यात आल्या.

संदीप मांदळे यांनी आपल्या बंधूच्या स्मृती जपण्याचे कार्य गेल्या पाच वर्षांपासून समाजहितासाठी करत आहेत. छोटा भाऊ विशाल मांदळे फौजी सेवेत असल्याने कार्यक्रमात प्रत्यक्ष सहभागी होऊ शकला नाही, परंतु वीर माता सुनंदा मांदळे व वीर पत्नी कांचन मांदळे यांच्या हस्ते रक्तदात्यांचा सत्कार व संविधानप्रत वितरण झाले. वीर पुत्र जयदीप, सूरज, सार्थक व प्रदीप्त मांदळे यांनी फौजी गणवेश परिधान करून पित्याला सलामी देत संपूर्ण परिसर दुमदुमवून टाकला.

कार्यक्रम यशस्वी करण्यासाठी कुणाल मांदळे, अरविंद, भारत, अमोल, संतोष, परेश, रोशन, समाधान यांनी अथक परिश्रम घेतले.

हा सोहळा देशभक्ती, बलिदान आणि अभिमानाने भारलेला ठरला. शहीद नायक प्रदीप साहेबराव मांदळे अमर राहो! 🇮🇳🔥