वाशिम जिल्ह्यात लाडकी बहीण योजनेचा लाभ न मिळाल्याने महिलांमध्ये तीव्र नाराजी

वाशिम जिल्ह्यात लाडकी बहीण योजनेचा लाभ न मिळाल्याने महिलांमध्ये तीव्र नाराजी

याचा फटका जिल्हा परिषद–पंचायत समिती निवडणुकीत बसण्याची शक्यता

       वाशिम जिल्हा प्रतिनिधी – विश्वास कुटे

राज्य सरकारची गाजलेली लाडकी बहीण योजना वाशिम जिल्ह्यात अनेक गरजू महिलांपर्यंत अजूनही पोहोचलेली नाही. गावागावात या योजनेबाबत नाराजीचा सूर उमटत असून, याचा थेट परिणाम येणाऱ्या जिल्हा परिषद व पंचायत समिती निवडणुकीवर होऊ शकतो, अशी चर्चा सुरू आहे.
विशेषतः विधवा, परित्यक्ता, कष्टकरी व आर्थिकदृष्ट्या दुर्बल महिलांनी अर्ज भरूनही त्यांच्या खात्यात पैसे जमा न झाल्याच्या तक्रारी केल्या आहेत. कुठे कागदपत्रांची अडचण, कुठे ऑनलाईन प्रक्रियेचा खोळंबा, तर कुठे प्रशासनाची दिरंगाई – अशा कारणांमुळे लाभ अडकून पडल्याचा आरोप महिलांकडून केला जात आहे.
“योजना सांगताना मोठमोठ्या घोषणा केल्या, पण आमच्या पदरात काहीच पडलं नाही,” अशी संतप्त प्रतिक्रिया अनेक महिलांनी व्यक्त केली आहे. त्यामुळे गाव पातळीवर लोकप्रतिनिधींना जाब विचारला जात असून, “आधी योजना द्या, मग मत मागा” असा थेट इशारा दिला जात आहे.
महिलांचा मतदानातील सहभाग मोठा असल्याने ही योजना निवडणुकीत निर्णायक ठरली असती, मात्र लाभ न मिळाल्याने महिलांचा रोष आता मतपेटीतून व्यक्त होण्याची शक्यता नाकारता येत नाही. राजकीय वर्तुळातही याबाबत गंभीर चर्चा सुरू झाली आहे.
प्रशासनाकडून प्रक्रिया सुरू असल्याचे सांगितले जात असले, तरी प्रत्यक्षात पैसे खात्यात जमा झाल्याशिवाय महिलांचा विश्वास बसणार नाही, अशी स्पष्ट भूमिका महिलांकडून मांडली जात आहे. निवडणुकीपूर्वी सर्व पात्र महिलांना योजनेचा लाभ मिळाल्यासच नाराजी कमी होईल, अन्यथा याचा राजकीय फटका अटळ असल्याचे जाणकारांचे मत आहे.
एकूणच, लाडकी बहीण योजना आता केवळ कल्याणकारी योजना न राहता, जिल्हा परिषद व पंचायत समिती निवडणुकीत मतदारांचा कौल ठरवणारा महत्त्वाचा मुद्दा ठरणार का, याकडे सर्वांचे लक्ष लागले आहे.